تصدرت أخبار محمد فؤاد المواقع وأحاديث الناس على السوشيال ميديا خلال الساعات الماضية، وهذا لأسباب فنية، وأسباب أخرى ليس لها علاقة بالوسط، ولكن قبل رجوعه انتشر خبر النصب عليه، إلى جانب رجوعه الفني القوي.
النجم محمد فؤاد قرر يرجعلنا من جديد، لأن آخر مرة جرب يرجع أوائل 2021 بـ3 أغاني الموضوع قلش، والرجوع ده مكنش محسوب، وخصوصا لما يكون نجم بحجم فؤش يعني، اللي قدم 19 ألبوم بدأهم بـ «في السكة» سنة 1983 وآخرهم كان «بين إيديك» سنة 2010، وكان من أقطاب الفن في وقت من الأوقات، وكمان عمل أفلام مسلسلات كتير.
وعلى ذكر بقى موضوع إنه من أقطاب الفن ده، فهنا بنتكلم عن بدايته هو والهضبة عمرو دياب، لأنهم الاتنين طلعوا في وقت واحد تقريبا، والمعركة بينهم، الفنية طبعا، كانت مشتعلة في التسعينات وأول الألفينات، قبل ما فؤش يختفي، وهو نفسه ميعرفش هو راح فين، ولكن عمرو دياب يفضل ميجا ستار وبابا المجال.
النجم محمد فؤاد شايف إن مفيش تنافس بينه وبين عمرو دياب ولا أي حد تاني، وكمان نفى إن يكون في معارك فنية بينهم، ده بيقول إنهم زمان كانوا بينزلوا يشتروا البنطلونات مع بعض، وكمان الهضبة حضر كل أفراح إخوات محمد فؤاد من غير عزومة، ومش بس كدة، فؤش هو اللي كان واقف مع عماد أخو الهضبة في عزا والدهم.
لكن فؤاد شايف إن الفن محتاج عمرو دياب، وبيمناله النجاح، لكن على الجانب التاني محتاج كمان وجوده هو شخصيا، وعشان كدة، هو محضرلنا 70 أغنية راجع بيهم، لأنه لما اتسأل.. انت كنت غايب فين؟ قام رد بجملة شبه بتاعة فيلم «المتسول» في المشهد اللي جمع الفنان وحيد سيف بالفنان علي الشريف.. لما قاله «أنا لما بغيب مبغيبش أونطة أنا بغيب عشان أفنن عشان أرسم عشان أخطط.. أنا شغلتي شغلة مزاج يا أستاذ مش لعب عيال»، نفس الكلام تقريبا كان على لسان فؤش، وهو بيقول، أنتوا كنتوا فاكرني غايب قاعد في البيت؟ لا أنا كنت شغال وعندي 70 أغنية هينزلوا قريب.
وكمان قال إن هو حاليا بيحضر لتصوير فيلم، بس رفض يكشف عن اسمه، ولا عن المشاركين معاه، ولا أي تفاصيل عن الفيلم، وغالبا هي فكرة لسة في دماغه منعرفش عنها حاجة.
وبمناسبة الشغل بقى، محمد فؤاد ليه قصة دايرة اليومين دول، وهي إن فجأة لقينا خبر انتشر على كتير من المواقع إن محمد فؤاد قدم بلاغ ضد شركة عقارية نصبت عليه في 12 مليون جنيه، والكلام بيقول إن هما أوهموه بإنهم بيعملوا شركة والتزم معاهم ودفع، ولكن مخدش منهم فوايد فاتهمهم بالنصب.
وللتوضيح في مارس 2021 أطلقت إحدى شركات الاستثمار العقاري مشروع في العاصمة الإدارية الجديدة باستثمارات 2 مليار جنيه، وبيضم مجلس إدارة الشركة الفنان محمد فؤاد، إلى جانب عدد من المتخصصين في مجال العقارات.
المهم يعني إن محمد فؤاد في أول رد ليه على الموضوع، قال محصلش ومعرفش، ومش عارف مين اللي طلع الإشاعة دي.
عموما هي الدنيا كدة، كل ما فنان يبدأ يرجع للساحة، تبدأ تظهر شوية حوارات من دي.. حاجة غريبة.
